कुरा एक वर्ष अगाडिकाे मात्र हाे, जब एभरेस्ट प्रिमियर लिग क्रिकेट (ईपीएल) का लागि खेलाडीको वर्गीकरणको सूची सार्वजनिक भएकाे थियाे, तर युवा बलर सन्दीप लामिछाने प्रतियोगिताको ‘ए’ ग्रेडमा परेनन् । सन्दीप त्यतिबेला ‘बी’ ग्रेडमा परे । कारण थियाे उनकाे अनुभव । क्षमतामा अब्बल भएपनि उनलार्इ अनुभवकाे कमीले धाेका दियाे ।
सन् २०१५ को अप्रिलमा नामिबियासँगको विश्व क्रिकेट लिग च्याम्पिनयसिपबाट अन्तर्राष्ट्रिय क्रिकेटमा ‘डेब्यु’ गरेका सन्दिप याे प्रतियाेगिता खेल्दा मात्र २ बर्षकाे अनुभव थियाे । जवकि ए ग्रेडमा पर्न ३ बर्ष खेलेकाे हुनुपर्ने थियाे ।
तर, यतिबेला सन्दिपकाे नाम ए ग्रेडमा पनि पहिलाे नम्वरमा पर्न थालेकाे मात्र छैन, पाेखरा प्रिमियर लिगमा विराटनगर टिमका मार्की खेलाडी छन् उनी । मार्की खेलाडीले प्रतियोगितामा कम्तीमा ३ लाख रुपैयाँ प्राप्त गर्नेछन् । विराटनगरले उनलाई दुई साता चल्ने प्रतियोगिताका लागि कम्तिमा ५ लाख रुपैयाँ दिएको बताइएकाे छ ।
ईपीएल सम्पन्न भएको र अहिलेसम्मकाे १० महिनामा सन्दीपको यात्रा भने कुनै सपना देखे जस्ताे छ । जुन किसिमकाे चर्चा र सफलता उनले पाए, ब्यक्तिगत रूपमा मनग्य पनि अाम्दानी गरे । १८ वर्षमा दाैडिरहेका सन्दिप खेलेरै करोडपति भएका छन् । साेच्दा पनि अनाैठाे लाग्नसक्छ कतिपयलार्इ, तर सन्दिपका लागि याे कुनै अनाैठाे पक्ष हाेइन, किनकि उनकाे क्षमताले उनलार्इ कराेडपती बनाएकाे छ ।
नोभेम्बरमा युएईको शारजाँहमा हुने टी–१० लिगको सिजन–२ का लागि केरला किङ्गसले अनुबन्धन गरेपछि सन्दीपले विदेशमा खेल्दा पाउने पारिश्रमिक रकमले कराेड छाेएकाे छ । साे प्रतियाेगिताबाफत सन्दीपले ३० हजार डलर (३४ लाख ८० हजार रूपैंया) पारिश्रमिक प्राप्त गर्नेछन् । सन्दीपले प्राप्त गर्न लागेको यो दोस्रो ठूलो रकम हो । यसअघि उनले ग्लोबल टी–२० क्यानाडा लिग खेल्दा ४० हजार डलर (४६ लाख ४० हजार रूपैंया) बुझेका थिए । इन्डियन प्रिमियर लिग (आईपीएल) मा दिल्ली डेयरडेभिल्सबाट खेल्दै सन्दीपले आफूलाई अन्तर्राष्ट्रिय क्रिकेटमा उभ्याएका थिए । त्यसमा उनले २० लाख भारू (३२ लाख रूपैंया) पारिश्रमिक पाएका थिए ।
क्यारेबियन प्रिमियर लिग सीपीएलमा वेस्ट इन्डिजका हस्ती क्रिस गेलसँगै खेलेका लामिछानेले त्यहाँ ५ हजार डलर (५ लाख ८० हजार रूपैंया) प्राप्त गरेका थिए । अहिलेसम्म सन्दीपले विदेशी फ्रेन्चाइज लिग खेल्दा पाएको कुल रकमले १ लाख डलर (१ करोड १६ लाख रूपैंया) नाघेको छ । युएईको शारजाँहमै अक्टोबर ५ देखि २१ सम्म अफगानिस्तान प्रिमियर लिग हुँदैछ । सन्दीपलाई नान्गहरले एसोसिएट खेलाडीका रूपमा लिएको छ । त्यसबापत उनले १५ हजार डलर (१७ लाख ४० हजार रूपैंया) बुझ्नेछन् ।
सन्दिपले जुन किसिमकाे कमाइ याे एक बर्षमा गरे त्याे अाश्चार्यमान्य कुरा भने हाेइन, तर, नेपाली खेलाडीले पनि अवसर पायाे भने नाममात्र हाेइन दाम पनि कमाउनछन् भन्रे प्रमाणित गरेका छन् ।
विदेशी लिगबाट सन्दीपको कमाइ
इन्डियन प्रिमियर लिग – २० हजार डलर (२३ लाख २० हजार रूपैंया)
ग्लोबल टी–२० क्यानाडा लिग – ४० हजार डलर (४६ लाख ४० हजार रूपैंया)
क्यारेबियन प्रिमियर लिग – ५ हजार डलर (५ लाख ८० हजार रूपैंया)
अफगानिस्तान प्रिमियर लिग – १५ हजार डलर (१७ लाख ४० हजार रूपैंया)
टी–१० लिग – ३० हजार डलर (३४ लाख ८० हजार रूपैंया)
