नेपाली भुमीमा च्याम्पियन बन्यो ओमान, लगातार चार जीत, अमेरीका ९२ रनले पराजित

ओमानका लागि नेपाली भूमी निकै फापेको छ । नेपालमा खेल्न आउनु अगाडी आइसीसी विश्वकप क्रिकेट लिग टुको चौथो स्थानमा रहेको ओमान घर फर्किदा शिर्ष स्थान हात पारेर जाने भएको छ । नेपालमा ओमानले खेलका चार खेलमा चारैमा जित निकाल्दै तालिकामा एकल अग्रता बनाएर फर्किने भएको छ । प्रतियोगिता अन्तर्गत यो सिरीजको अन्तिम खेलमा ओमानले अमेरीकालाई ९२ रनले हरायो ।

कीर्तिपुर क्रिकेट मैदानमा टस हारेर ब्याटिङको निम्तो पाएको ओमानले ५० ओभरमा ६ विकेट गुमाउँदै दुई सय ७६ रन बनायो । उसका लागि कप्तान जिसान मक्सुद र अकिव इलियासले तेस्रो विकेटका लागि कीर्तिमानी २१६ रनको साझेदारी गरे । जुन अन्तराष्ट्रिय एकदिवसिय क्रिकेटमा ओमानका खेलाडीले गरेको अहिलेसम्म कै ठुलो साझेदारी हो ।

यसअघि नेपाल विरुद्ध यी दुई खेलाडीले एक सय ६७ रनको साझेदारी गरेका थिए । जुन सो बेलाको उच्च साझेदारी थियो । ३१ रनमा दुई विकेटको अवस्थामा दुई खेलाडीले ओमानको पारीलाई सम्हालेका थिए । ओमानका ओपनर खवार अली १० रनमा आउट भएपछि ओमानले २१ रनमा पहिलो विकेट गुमाएको थियो । त्यसपछि जतिन्दर सिंह पनि मात्र नौ रनमा आउट हुँदा ओमानले ३१ रनमा दोस्रो विकेट खेर फाल्यो ।

तर त्यसपछि ओमानका अकिब र मक्सुदले अमेरीकी बललाई हुरुक्क पारे । कप्तान जिसनले एक सय नौ रन बनाए । उनले एक सय नौ बलमा १० चौका र चार छक्का प्रहार गरे । यस्तै अकिबले पनि उत्कृष्ट ब्याटिङ गर्दै शतक बनाए । उनले एक सय २३ बलमा ११ चौका र एक छक्काको मद्दतले एक सय पाँच रन बनाए ।

ओमानका लागि एकदिवसिय क्रिकेटमा लगातार दुई खेलमा दुई शतक बनाउने अकिब पहिलो खेलाडी बनेका छन । यसका साथै उनी ओमानका लागि अन्तराष्ट्रिय क्रिकेटमा सर्वाधिक शतक बनाउने खेलाडी पनि बनेका छन । यस्तै जारी विश्वकप क्रिकेट लिग दुई मा सर्वाधिक रन बनाउने खेलाडी पनि उनी नै हुन । उनले अहिलेसम्म ६ सय भन्दा बढि रन बनाइसकेका छन । जसमा उनको दुई शतक र चार अर्धशतक रहेको छ ।

ओमानको स्कोर दुई सय ४७ रन हुँदा ओमानले तेस्रो विकेट गुमायो । त्यसपछि क्रिजमा आएका नासिम खुसी मात्र पाँच रनमा आउट हुँदा ओमानले दुई सय ५५ रनमा पाँचौ विकेट गुमायो । त्यसपछि जिसानपनि आउट हुँदा ओमानले दुई सय ५८ रनमा पाँचौ विकेट गुमायो ।

ओमानले बनाएको यो स्कोर उसको एकदिवसिय क्रिकेटमा बनाएको अहिलेसम्म कै ठुलो स्कोर हो । यसअघि ओमानले यहि प्रतियोगितामा नामेविया विरुद्ध बनाएको दुई सय ७२ रन सर्वाधिक ठुलो स्कोर थियो ।

बलिङमा अमेरीकाका सौरभ नेत्रवाल्करले तीन तथा रुस्टी थेरोनले दुई विकेट लिए ।

जवाफमा अमेरीका ३९ ओभर एक बलमा एक सय ८४ नमा अलआउट भयो । सुरुवात राम्रो गर्न नसकेको अमेरीकाले तीन रनमा पहिलो विकेट गुमायो । उसका ओपनर मोनांक पटेलले खाता खोल्न सकेनन् । त्यसपछि क्रिजमा आएका स्टेभन टेलरपनि खाता खोल्न नपाउँदै पेभेलियन फर्किएपछि अमेरीकाले तीन रनमा नै दोस्रो विकेट खेर फाल्यो ।

सुरुवातमा नै दबावमा आएको अमेरीकाले ६३ रन बनाउदा चार विकेट खेर फालेको थियो । उसका जेभियर मार्सल २३ रनमा आउट भए भने इयान होलाण्ड २८ रनमा पेभेलियन फर्किए । त्यसपछि अक्क्ष्य होमराजपनि सात रनमा आउट भएपछि अमेरीकाको पारी कमजोर बन्यो ।

छैटौं विकेटका लागि निसार्ग पटेल र आरोन जोन्स विच ७० रनको साझेदारी भएको थियो । तर पटेल ५२ रनमा आउट हुँदा अमेरीकाले एक सय ४९ रनमा छैटौं विकेट खेर फाल्यो । त्यसपछि अमेरीकाले स्कोरबोर्डमा २१ रन थप्दा अरु दुई विकेट गुमायो । करिमा गोरे दुई रनमा आउट भए भने कामरोन स्टेमेन्सन चार रनमा पेभेलियन फर्किए । त्यसपछि रोस्टी थेरोन १२ रनमा आउट भए ।

बलिङमा अकिब लियास र विलाल खानले तीन तीन विकेट लिए ।