मुख्य प्रशिक्षक डेभ ह्वाटमाेरद्वारा राजिनामा

नेपाली क्रिकेट टिमका मुख्य प्रशिक्षक डेभ ह्वाटमोरले राजिनामा दिएको दावी भारतीय समाचार संस्था न्युज नाइनले गरेको छ ।

न्युज नाइनले आधिकारीक ट्विटर ह्यान्डलमा ह्वाटमोरले मुख्य प्रशिक्षकबाट राजिनामा दिएको बताएको छ । सो सञ्चार माध्यमले ह्वाटमोरको ब्यवस्थापक कम्पनी फस्र्टस्पोर्टसइभेन्ट वनलाई उदृत गर्दै राजिनामा दिएको पुष्टि भएको हो ।

हाल ओमानमा रहेका ह्वाटमोरले भने यो विषयमा कुनै कमेन्ट गर्न नखोजेको जनाएको छ । ओमानमा आइसीसी विश्वकप क्रिकेट लिग टु का लागि ओमानमा रहेको नेपाली टिमको प्रशिक्षण दिइरहेका बेला उनको राजिनामाको कुरा सार्वजनिक भएको छ ।

गत डिसेम्बरमा खुल्ला छनोटबाट नेपाली राष्ट्रिय टिमको मुख्य प्रशिक्षकमा चयन भएका निकै अनुभवी प्रशिक्षक ह्वाटमोर करिव एक महिनापछि नेपाल आएका थिए । तर नेपाल आएको तीन चार महिनासम्म पनि उनको श्रम स्विकृती नहुँदा उनी टुरिस्टका रुपमा काम गरेका थिए । जसका कारण उनले सुरुवातमा नियमित तलवपनि पाउन सकेका थिएनन् ।

उनको तलवको कुरालाई आइसीसी र एसीसीसँगको छलफलमा टुंगो लगाएको क्यान राजिनामा बारेमा भने अनभिज्ञ नै छ । न्युज ९ को ट्विटपछि क्यानका सचिवसँग कुरा गर्दा यो विषयमा आफुलाई कुनै जानकारी नभएको र उनले दिउँसोसम्म कुनै त्यस्तो कुरा नगरेको बताए । उनले यो विषयमा आफुले पनि बुझ्नुपर्ने बताए ।

यदि ह्वाटमोरले राजिनामा दिएको कुरा सत्य हो भने उनी नेपाल आएको नौ महिनामा नै छोड्ने निर्णयमा पुगेका हुन । उनी ओमानमा हुने सिरिज सकिएपछि नेपाली टिम छोड्ने बताइएको छ ।

श्रीलंकालाई विश्वकपको उपाधि दिलाएका प्रशिक्षक ह्वाटमोरले अचानक राजिनामा दिएको खबर भारतीय मिडियाले सार्वजनिक गरेपछि नेपाली क्रिकेटमा तहल्का मच्चिएको छ ।

कोभिडका कारण नेपालले अन्तराष्ट्रिय क्रिकेट प्रतियोगिता निकै कम खेलेको छ । त्यसमा पनि ह्वाटमोर आएपछि नेपालले पहिलो पटक विदेशी भूमीमा प्रतियोगिता खेल्न लागेको हो । उनको प्रशिक्षणमा नेपालले घरेलु मैदानमा त्रिकोणात्मक टी २० क्रिकेट प्रतियोगिता खेलेको थियो । जसमा नेपाल च्याम्पियन बनेको थियो ।

त्यो बेलासम्मपनि क्यानले उनको श्रम स्विकृती लिन सकेको थिएन । त्यसपछि कोभिडका कारण लकडाउन हुँदा ह्वाटमोर दुई पटक श्रीलंका फर्किएका थिए ।

यस लेखमा उल्लेखित विषयहरु

Related Stories

More Stories

Latest