पीएम कप: प्रदेश २ माथि लुम्बिनीको जित

प्रधानमन्त्री कप टि २० राष्ट्रिय क्रिकेट प्रतियोगितामा लुम्बिनी प्रदेशले प्रदेश २ लाई ४२ रनले पराजित गरेको छ ।

कीर्तिपुरस्थित त्रिवि क्रिकेट मैदानमा आज भएको दोस्रो खेलमा लुम्बिनी प्रदेशले प्रदेश २ लाई ४२ रनले पराजित गर्दै प्रतियोगितामा पहिलो जित दर्ता गराएको हो । यसअघि लुम्बिनी आफ्नो पहिलो खेलमा बागमती प्रदेशसँग ४९ रनले पराजित भएको थियो ।

प्रदेश २ को भने तीन खेलमा दोस्रो पराजय हो । यसअघि प्रदेश नं २ ले पहिलो खेल सशस्त्र प्रहरी बल (एपीएफ) क्लबसँग २४ रनले हारेको थियो । तर दोस्रो खेलमा गण्डकी प्रदेशलाई २ विकेटले पराजित गरेको थियो ।

खेलमा लुम्बिनीले प्रदेश २ लाई १६२ रनको बलियो लक्ष्य दिएको थियो । जवाफमा प्रदेश २ को २० ओभरमा ९ विकेट गुमाउँदै ११९ रनमा समेटियो । प्रदेश २ का लागि विवेक यादवले सर्वाधिक ३६ रन जोडे । हरिकृष्ण झा र सन्तोष कार्कीले समान १४–१४ रन बनाए ।

त्यसअघि टस जितेर पहिले ब्याटिङ गरेको लुम्बिनीले निर्धारित २० ओभरमा ८ विकेट गुमाउँदै १६१ रन बनाएको थियो । लुम्बिनीका ओपनर देव खनालले ३८ बलमा ४ चौका र २ छक्कासहित सर्वाधिक ५४ रनको योगदान दिए ।

त्यसैगरी सन्दीप रजाली र बशिर अहमदले समान ३०-३० रनको योगदान दिए भने सुशान्त थापाले १४ रन बनाए । सौरभ खनालले १०, कृष्ण कार्की १, विक्रम भुसाल ५ रन जोड्दा दुर्गेश गुप्ता, मोहन क्षेत्री र सिद्धान्त शाहीले खाता खोल्न सकेनन् ।

प्रदेश २ का विवेक यादव र रुपेश सिंहले २÷२ विकेट लिए भने हरिशंकर शाह, महबुब आलम र विशाल शुस्लिङले एक विकेट झारे ।

यस लेखमा उल्लेखित विषयहरु

Related Stories

More Stories

Latest